Память: 12 мая (29 апреля ст. ст.)
Тропа́рь, глас 4:
Земли́ Волы́нския пресла́вна подви́жника/ и оби́тели Поча́евския досто́йна насе́льника,/ люде́й правосла́вных изря́дна цели́теля,/ яви́ тя Це́ркви Свое́й Христо́с Бог наш,/ преподо́бне о́тче Амфило́хие,/ Ему́же усе́рдно моли́ся// от наве́т вра́жиих свободи́тися и спасти́ся душа́м на́шим.
Стихи́ра, глас 6:
Днесь благода́ть Свята́го Ду́ха нас собра́/ с ли́ком А́нгельским/ и собо́ром Волы́нских святы́х/ пра́здновати па́мять/ Амфило́хия достохва́льнаго,/ той бо мо́лит дерзнове́нно/ о земли́ на́шей,/ во е́же в ми́ре/ и благостоя́нии ей бы́ти// и спасти́ся душа́м на́шим.
Кано́н преподо́бнаго, глас 1.
Пе́снь 1.
Ирмо́с: Твоя́ победи́тельная десни́ца, боголе́пно в кре́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая.
Припев: Преподо́бне о́тче Амфило́хие, моли́ Бо́га о на́с.
Благода́тную по́мощь Твою́, Го́споди, низпосли́ на́м, во е́же воспе́ти уго́дника Твоего́, отца́ на́шего Амфило́хия, благоче́стия подви́жника и ла́вры Поча́евския украше́ние ди́вное.
Припев: Преподо́бне о́тче Амфило́хие, моли́ Бо́га о на́с.
Любо́вь и благоче́стие роди́тельское, я́же измла́да восприе́м, чрез все́ житие́ досто́йно проне́сл еси́, от си́лы в си́лу восходя́ ду́хом, блаже́нне.
Припев: Преподо́бне о́тче Амфило́хие, моли́ Бо́га о на́с.
А́ще и плене́н бы́л еси́ на бра́ни от враго́в ви́димых, но неви́димаго пле́на страсте́й избежа́л еси́, преподо́бне, пло́ть покаря́я ду́ху.
Богоро́дичен: Жи́знь ве́чную со святы́ми жела́я улучи́ти, Ма́терь Бо́жию вседу́шно возлюби́л еси́, свя́те, и, в дому́ Ея́ на горе́ Поча́евстей всели́вся, досто́йне Бо́гу послужи́л еси́.
Пе́снь 3.
Ирмо́с: Еди́не ве́дый челове́ческаго существа́ не́мощь, и ми́лостивно в не вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.
Припев: Преподо́бне о́тче Амфило́хие, моли́ Бо́га о на́с.
Егда́ у гро́ба настоя́теля почи́вшаго моли́лся еси́, преподо́бне, откры́ Госпо́дь тебе́ суету́ жития́ вре́меннаго, те́мже, помышля́я о жи́зни ве́чней, нача́т грехи́ своя́ пред все́ми испове́дати.
Припев: Преподо́бне о́тче Амфило́хие, моли́ Бо́га о на́с.
Нарече́н бы́в, блаже́нне, Ио́сиф, е́же сказу́ется преумно́женный, сего́ ра́ди потща́лся еси́ благода́ть в се́рдцы твое́м оби́льно преумножа́ти.
Припев: Преподо́бне о́тче Амфило́хие, моли́ Бо́га о на́с.
Егда́ са́ном иере́йским почте́н бы́л еси́, свя́те, тогда́ моли́твы, поще́ния и по́двиги усугу́бил еси́, бе́си же, не терпя́ще доброде́тельнаго жития́ твоего́, мно́гажды тя́ хотя́ху погуби́ти, ты́ же си́лою Бо́жиею при́сно храни́мь бы́л еси́.
Богоро́дичен: Сла́внейшая без сравне́ния Серафи́м и честне́йшая Херуви́м, Пресвята́я Де́во, услы́ши моле́ния и мольбы́ на́ша, и по́мощию Твое́ю неотсту́пна бу́ди от на́с.
Конда́к, гла́с 3:
Я́ко ве́ры правосла́вныя ревни́тель и благоче́стнаго жития́ учи́тель, в боле́знех и ско́рбех изря́дный помо́щник, пред Го́сподем предстои́ши, преподо́бне Амфило́хие, сего́ ра́ди вопие́м ти́: защити́ оби́тель, в не́йже подвиза́лся еси́, и спаса́й на́с моли́твами твои́ми, о́тче блаже́нне.
Седа́лен, гла́с 3:
Христо́вою любо́вию преиспо́лнився, преподо́бне Амфило́хие, Ду́хом Святы́м ко спасе́нию наставля́л еси́ вопроша́ющих и та́ко, я́ко свети́льник, во тьме́ неве́дения седя́щим просия́л еси́. Те́мже моли́ся за ны́ ко Го́споду, да просвети́мся и мы́ Его́ благода́тию.
Богоро́дичен: Ма́ти Бо́жия, Покро́в Тво́й спаси́тельный ми́ру до́льнему с Небесе́ явля́ющая, не оста́ви на́с, во гресе́х погиба́ющих и Го́спода Милосе́рднаго прогневля́ющих, Его́же моли́ изба́витися на́м душепа́губнаго заблужде́ния, я́ко Предста́тельница на́ша кре́пкая и Помо́щница ско́рая.
Пе́снь 4.
Ирмо́с: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.
Припев: Преподо́бне о́тче Амфило́хие, моли́ Бо́га о на́с.
Избра́нный сосу́д Ду́ха Свята́го бы́в, мно́гия боля́щия благода́тию Бо́жиею исцели́л еси́ и бесо́в полки́ победи́л еси́, о́тче блаже́нне. Приими́ моли́твы на́ша и от я́зв грехо́вных исцели́.
Припев: Преподо́бне о́тче Амфило́хие, моли́ Бо́га о на́с.
О́браз му́жества и дерзнове́ния богому́драго в тебе́ зри́м, о́тче преподо́бне, хра́м бо Святы́я Тро́ицы от поруга́ния и запусте́ния сохрани́л еси́ и ве́рныя лю́ди, в ско́рби су́щия, возвесели́л еси́.
Припев: Преподо́бне о́тче Амфило́хие, моли́ Бо́га о на́с.
То́ки сле́з пролива́л еси́, преподо́бне, о заблу́ждших ча́дех Це́ркве Правосла́вныя, вре́менная бла́га па́че ве́чных бла́г возлюби́вших.
Богоро́дичен: Чту́щих Тя́ и в пе́снех велича́ющих, не отри́ни на́с, Пресвята́я Де́во, ины́я бо Хода́таицы и Засту́пницы ра́зве Тебе́ не и́мамы.
Пе́снь 5.
Ирмо́с: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия правосла́вно пою́щих Тя́.
Припев: Преподо́бне о́тче Амфило́хие, моли́ Бо́га о на́с.
Егда́ в темни́цу лю́тии гони́телие всади́ша тя́ к бесны́м и ума́ лише́нным, тогда́ смире́нне взыва́л еси́, о́тче блаже́нне: сла́ва Бо́гу, благоде́явшему ми́.
Припев: Преподо́бне о́тче Амфило́хие, моли́ Бо́га о на́с.
Ни ско́рбь, ни теснота́, ни гоне́ния, ни гла́д, ни нагота́, ниже́ беда́, ни ме́ч, ни и́на ка́я напа́сть не возмо́же разлучи́ти тя́ от любве́ Бо́жия, о́тче преподо́бне.
Припев: Преподо́бне о́тче Амфило́хие, моли́ Бо́га о на́с.
А́нгел земны́й и челове́к Небе́сный яви́лся еси́, о́тче, мно́гия бо ско́рби в житии́ безро́потне поне́сл еси́, те́мже и воздая́ния мно́га на Небеси́ восприя́л еси́, блаже́нне.
Припев: Преподо́бне о́тче Амфило́хие, моли́ Бо́га о на́с.
Богоро́дичен: Ше́дше, возвести́м все́м язы́ком, коли́кая чудеса́ сотвори́ Пресвята́я Богоро́дица во уде́ле Свое́м Поча́евстем и ка́ко ми́лует все́х, с ве́рою приходя́щих к Не́й.
Пе́снь 6.
Ирмо́с: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния. Спаси́ лю́ди Твоя́, Бо́же на́ш: Ты́ бо кре́пость немощству́ющих и исправле́ние.
Припев: Преподо́бне о́тче Амфило́хие, моли́ Бо́га о на́с.
Амфило́хий в схи́ме святе́й нарече́н бы́в, преподо́бне, труды́ ко трудо́м прилага́л еси́ и доброде́тельми, я́ко степе́ньми, во Ца́рствие Небе́сное возше́л еси́.
Припев: Преподо́бне о́тче Амфило́хие, моли́ Бо́га о на́с.
Мно́жество боля́щих, приходя́щих к тебе́, исцеля́л еси́ и стра́ждущих свобожда́л еси́ от духо́в нечи́стых, кро́тостию и смире́нием те́х побежда́я.
Припев: Преподо́бне о́тче Амфило́хие, моли́ Бо́га о на́с.
Фесви́тянину Илии́ ре́вностию подража́я, преподо́бне, любо́вию боже́ственною се́рдце твое́ распаля́л еси́ и, в терпе́нии ду́шу твою́ укрепля́я, проро́чески вопия́л еси́: с на́ми Бо́г, разуме́йте, язы́цы, и покаря́йтеся, я́ко с на́ми Бо́г.
Богоро́дичен: И́мя Твое́, Пречи́стая, вси́ ро́ди правосла́вных непреста́нно велича́ют, и ли́цы церко́внии сладкогла́сно воспева́ют: Богоро́дице Влады́чице, спаси́ на́с, мно́гими бо напа́стьми обстои́ми есмы́.
Конда́к, гла́с 2:
Изволе́нием Де́вы Пречи́стыя в оби́тели Поча́евстей всели́лся еси́, иде́же, подви́жническое и ско́рбное житие́ провожда́я, да́ром моли́твы у́мныя обогати́лся еси́ и Ца́рствия Небе́снаго насле́дник яви́лся еси́. Те́мже вопие́м ти́: ра́дуйся, Амфило́хие, о́тче блаже́нне, целе́бниче и чудотво́рче.
И́кос:
Сокро́вища Небе́снаго взыску́я, преподо́бне, Го́спода Иису́са, я́ко би́сер многоце́нен, обре́л еси́ и, вся́ Его́ ра́ди оста́вив, стори́цею в пакибытии́ прия́л еси́. Ны́не же душе́ю твое́ю светолу́чною на Небесе́х сия́я и моща́ми многоцеле́бными во оби́тели Поча́евстей пребыва́я, прие́млеши целова́ние от почита́ющих тя́ и велегла́сно взыва́ющих: ра́дуйся, Амфило́хие, о́тче блаже́нне, целе́бниче и чудотво́рче.
Пе́снь 7.
Ирмо́с: Авраа́мстии о́троцы в пещи́ Тро́ицу прообрази́вше, о́гненный пла́мень на ро́су преложи́ша и, пою́ще, вопия́ху: благослове́н еси́, Бо́же оте́ц на́ших.
Припев: Преподо́бне о́тче Амфило́хие, моли́ Бо́га о на́с.
Ла́вра Поча́евская, иде́же подвиза́лся еси́, преподо́бне, приста́нище ти́ яви́ся, усыпа́льница же ея́ мо́щи твоя́ прия́т, я́же три́десять ле́т та́мо в земли́ лежа́ху и тле́нию не преда́хуся.
Припев: Преподо́бне о́тче Амфило́хие, моли́ Бо́га о на́с.
От ве́си Малои́ловицкия ме́ртвенное те́ло твое́ во оби́тель Поча́евскую бра́тия принесо́ша и во усыпа́льнице бра́тстей с че́стию погребо́ша. Ты́ же, преподо́бне, во оби́телех Небе́сных пребыва́я, за ны́ мо́лишися Бо́гу.
Припев: Преподо́бне о́тче Амфило́хие, моли́ Бо́га о на́с.
Хода́тай к Бо́гу о лю́дех в житии́ твое́м бы́л еси́, о́тче преподо́бне, и по преставле́нии хода́тайствуеши о все́х, с ве́рою ко гро́бу твоему́ приходя́щих, и ми́лостивый послу́шатель и́м быва́еши.
Богоро́дичен: Испещре́на ря́снами златы́ми, я́ко Цари́ца, Царя́ и Бо́га одесну́ю ны́не предстои́ши, Влады́чице, моля́щи о все́х, ко о́бразу Твоему́ на горе́ Поча́евстей притека́ющих.
Пе́снь 8.
Ирмо́с: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.
Припев: Преподо́бне о́тче Амфило́хие, моли́ Бо́га о на́с.
Егда́ лю́дие, одержи́мии ду́хи нечи́стыми, ко гро́бу твоему́ притека́ху, преподо́бне, бе́си, в ни́х су́щии, твоея́ свя́тости терпе́ти не могу́ще, гро́мкими гла́сы вопия́ху, огне́м Бо́жия благода́ти опаля́еми.
Припев: Преподо́бне о́тче Амфило́хие, моли́ Бо́га о на́с.
Пресла́вное чу́до о тебе́ зри́м, преподо́бне, ты́ бо, я́ко при жи́зни, та́ко и по преставле́нии, лю́дем стра́ждущим помога́еши и от лю́тых обстоя́ний с ве́рою приходя́щих к тебе́ свобожда́еши.
Припев: Преподо́бне о́тче Амфило́хие, моли́ Бо́га о на́с.
Ра́дости неизглаго́ланныя испо́лнишася мона́си и мирсти́и, егда́ те́ло твое́, преподо́бне, три́десять ле́т в земли́ погребе́нное, нетле́нно и благоуха́ния испо́лнено обре́теся.
Богоро́дичен: Еди́на благослове́нная и богора́дованная Влады́чице, Я́же ра́дость челове́ком ро́ждши неизрече́нную, испо́лни ра́дости сердца́ на́ша, да просла́вим ро́ждшагося от Тебе́ Христа́.
Пе́снь 9.
Ирмо́с: О́браз чи́стаго Рождества́ Твоего́, огнепали́мая купина́ показа́ неопа́льная, и ны́не на на́с напа́стей свире́пеющую угаси́ти мо́лимся пе́щь, да Тя́, Богоро́дице, непреста́нно велича́ем.
Припев: Преподо́бне о́тче Амфило́хие, моли́ Бо́га о на́с.
Чудеса́ и исцеле́ния то́чиши все́м, приходя́щим и усе́рдно моля́щимся тебе́ и благогове́йно покланя́ющимся честны́м моще́м твои́м, преподо́бне о́тче Амфило́хие.
Припев: Преподо́бне о́тче Амфило́хие, моли́ Бо́га о на́с.
Украше́ние ла́вры Поча́евския яви́лся еси́, преподо́бне, нетле́нным бо те́лом твои́м в пеще́рнем хра́ме ку́пно со И́овом преподо́бным почива́еши и все́м, приходя́щим к тебе́, при́сно помога́еши.
Припев: Преподо́бне о́тче Амфило́хие, моли́ Бо́га о на́с.
Да́л еси́ зна́мение, Го́споди, кре́ст о́блачный на небеси́ в де́нь прославле́ния преподо́бнаго Амфило́хия, и си́м кресто́м благослови́л еси́ все́х, прише́дших почти́ти па́мять уго́дника Твоего́.
Тро́ичен: Неразде́льная Тро́ице, во Еди́нице покланя́емая, О́тче, Сы́не и Святы́й Ду́ше, спаси́ и сохрани́ все́х, почита́ющих па́мять уго́дника Твоего́ Амфило́хия.
Богоро́дичен: Еди́на Чи́стая и Непоро́чная, Бо́га без се́мене ро́ждшая, Богоро́дице Влады́чице, моли́твами уго́дника Твоего́ Амфило́хия покры́й и соблюди́ на́с от вся́каго зла́.
Свети́лен:
По́двигом до́брым подвиза́вся, просия́л еси́, Амфило́хие чудотво́рче, в земли́ Волы́нстей, я́ко свети́льник Боже́ственныя благода́ти, возжже́нный в ла́вре Поча́евстей. Те́мже по́мощию твое́ю не оста́ви все́х, с ве́рою к тебе́ притека́ющих.
Сла́ва: Свети́льника ве́ры и о́браз богоуго́днаго жития́, на горе́ Поча́евстей возсия́вшаго, преподо́бнаго Амфило́хия, яви́л еси́ на́м, Христе́ Спа́се, то́й бо зе́млю на́шу све́том Ева́нгелия просвеща́ет и пу́ть спасе́ния на́м указу́ет.
И ны́не: Де́во Пресвята́я, Сы́на Бо́жия Единоро́днаго пло́тию ро́ждшая, И́же от Отца́ рожде́ннаго пре́жде все́х ве́к, моли́ Ду́ха Свята́го благода́тию осия́ти оби́тель сию́ и сохрани́ти ю́ моли́твами избра́нника Твоего́, преподо́бнаго Амфило́хия, Бо́га в Тро́ице Святе́й почита́ющаго.
